الاقصى نادى والندى غالي ...ويهون عشانه العمر لو غالي
? يسقط الواد وأبوه: مشروع قانون

« Home | كل عام وأنتم بألف خير » | النظرية المباركيه » | لأ يا عمده لأ » | البدايه " لعلها تكون بفايده" »

مشروع قانون


مجرد أقتراح
من الغريب فعلا انتشار ظاهرة الرشوة بصورة غريبة واعتبارها شيء عادي فعندما يهمس الموظف بطريقه رومانسية في أذن سعادتك " كلك نظر" "و تشيلني وأشيلك" وكلام كثير من هذا النوع وعندما يقول المعتدلون أنها رشوة يردد الراشي والمرتشي على حد سواء أنا تسليك مصالح لا أكثر ولا أقل والغريب أيضا أصبح وجود موظف شريف غير مرتشي خروجا عن القاعدة .
فأنا من هذا المنطلق أطالب الحكومة
" سيعتقد الكثيرين أني أطالب بتوقيع أقصى العقوبة وهي الإعدام شنقا لكل مرتشي "
لا يا رجالة فاتت عليكم المرة دي
وهذا ملخص لما أريد تفعيلة :
_ أطالب الحكومة بتقنين الرشاوى وكفالة الغطاء القانوني لها على أساس أنها أصبحت ظاهرة عاديه والحاجة أم الاختراع .
_ يتم تقسيم الرشوة حسب المنصب من أول ساعي المكتب إلى الناس الكبار قوي
وفي المقابل تصنف المصالح المراد تسليكها الي فئات فمن غير المنطقي أن نساوي بين شهادة صحية مضروبة وبين شهادة صحية لعبارة مضروبة برضة .
_ ويتم تشطيب قانون للعقوبات " طبخ كلة قديمة قوي غيروا " مزدوج حيث يعاقب المواطن الذي يرفض تقديم رشوة بأرغامة على دفع الرشوة دوبل وتعطيل مصالحة لمدة لا تقل عن 30 يوم ولا تزيد عن 5 سنوات " ويتعلم عليه" اذا اراد قضاء مصالح أخرى .
أما الموظف الذي يرفض أخذ الرشوة فيتم وصمة بأنه مواطن شريف مع كوكتيل عقوبات خصم وتأخير الترقيه ويتم نقله الى أماكن وبؤر الرشاوي في البلد عقابا له على ما أقترفته يديه .
_ ملحوظة :ةيجب احتفاظ الرشوة بأسمها حتى لا تفقد مبادئها ومعانيها السامية وحتى لا يقوم الموظفين بأختراع أشكال أخرى من الرشاوي.
_ يتم أنشاء المجلس الاعلى للرشاوي تمهيدا لان تصبح وزارة مستقلة ويترأس هذا هذا المجلس أكبر أشاوسة الرشاوي في مصر.
_ وعنه يتم انشاء صندوق للرشاوي على غرار صندوق الزمالة و يكون الصندوق زجاجي ليضرب به المثل في الشفافيه المفتقده كثيرا في مصر .
_ يتم تقسيم محتويات الصندوق بين الحكومة والممولين " الموظفين" كما ذكرت حسب المنصب ويقدم الصندوق اعانات عاجلة للموظفين المتهمين بالاختلاس وتبديد العهدة والتجارة في العملة وغيرها من القضايا التي تخل بالشرف فقط .
_ يتم أستشارة فضيلة المفتي في مدى مشروعية تقديم تأشيرات الحج والعمرة من هذا الصندوق " أتوقع الموافقة " بمنطق : من والى الشعب ، والخروج عن الحاكم جريمة ومن قدم شيىء بيداه التقاه وانا لله وانا اليه لراجعون .
_ يقيم الصندوق حفل يومي يضم كل من أسود الرشوة وزوجاتهم والاشبال ويقدم جوائز في المجالات التاليه :
- جائزة احسن مرتشي محترف
- جائزة احسن ناشىء مرتشي
- جائزة أحسن طريقه للرشوة
- وجوائز عن مجمل الاعمال
- وجوائز تشجيعية أخرى
_ أخيرا يتم تلخيص هذه القوانين والتوصيات فيما لا يقل عن 350 صفحة حتي لا يتسنى لاحد قراءته ويعرض على مجلس الشعب موافقون موافقة وخلص الموضوع " وهي جت على دي مافيه القوانين سيئة السمعة وقانون القضاة وقوانين منع النشر خالص" وكده يبقى الموضوع اتحل


Arabforever2004@yahoo.com

ربنا يديك الصحة

وتشوف احلامك بتحقق ادامك كده

وابقي ادعيلي

هههههههه

بس اوعي ساعتها بقي تنسانا ... وتطلع فيها

ادم المصري
نورت المدونه

انت عارف يا عم روميل ان انا معييش بطاقه مصريه لحد الان بسب موضوع الرشوه وعدم فهم نظام الرشاوى بيشتغل ازاى

2 R
ربنا معاك ومعانا كلنا
ههههههه أنا عرفت يعني ايه كوسه وأنا في الابتدائي لما ابن المدرسه خد الجايزه بدالي
دي برضه تعتبر رشوه على قفايا

يا ليلة زرقا؟؟
على كدة مش حاعرف اطلع مستخرج من اى حاجة الا لما ابيع اللى ورايا واللى ادامى
ليلتك مالهاش الوان لو اتحقق حلمك دة
-------
مرو واحدة دفعت فيها رشوة
عشان اقبض اول مرتب ليا
وبعدها


طلعتها من عينه
اخدتها منه ضعفين عشان مابلغش عنه
دفعللى هو رشوة
ههههههههههههههه

شهروزةالجميله
المقصد من هذا الاقتراح
أن الممنوع مرغوب فنمع النزاهه فتصبح مطلوبه
نورتي المدونه

هههههههههههههههههههههههههههههههه
عجبني و فكرني بطريقة أحمد رجب و بالذات اللي عجبتني الجوايز

ALiaa
شكرا على الزيارة
ده شرف ليا لما أتشبه بكاتب كبير زي الأستاذ أحمد رجب

الكلام الي انت قلته زي الفل
بس فيه مشكله كبيره
لو نزل قانون للرشوه هتلاقي واحد عايز يهرب من القانون ده فيدفع رشوه لواحد مرتشي علشان يهرب من قانون الرشوه
بس ساعتها مش هتكون اسمها رشوه
ممكن يسموها اسم تاني
لأن رشوة الهروب من الرشوه ماهياش رشوه
امال اسمها ايه ؟؟؟
ولو عرفت الحل اتصل بزيرو تسعميه
تكسب اي حاجه من الي بتيجي في التلفزيون

انا موافقك بس بلاش كلمة رشوة دي لان الرشوة حرام ممكن ندلعها نقول اكرامية او مهلبية زي نافوخك منك لله عاوز تعمم الشر انت ولد مفسد وانا هاخطف رجلي لعم المفتى واستصدر فتوى واحل دمك لو ما كنتش اتبرعت بيه كله يا سيد العاقلين وعاوز تبقى صحفي ابقى تعالي ... على قبري هههههههههههههه عسل يا واد يا فقر

واحد من الناس
هيه ناقصه لخبطه
هو فيه حد حيدفع رشوة علشان يهرب من رشوة
وعموما لازم نعوم الرشوة زي ما عوموا الجنيه الله يخرب بيوتهم
ونسيب الرسوة تتحدد على حسب معطيات السوق ولازم يبقى فيه منافسه شريفه طبعا
العملية مدروسه بدقه متقلقش
نورتنا يا واحد مننا

المزاجنجي
عم الكل ايه الغيبه دي ؟
ما علينا مش عاجبك الاسم نغيره بس انا قولت علشان مفيش اي اعراض جانبيه تطفو على سطح هذا المشروع النبيل
وعلى فكره انا رحت للمفتي قبلك والراجل معانا يا معلم ما هي الضرورات تبيح المحظورات
فاهمني يا مزاجنجي

مدونتك واسلوبك جميل ROMIL

بالنسبة لموضوع الرشوة دا كنت اسمعه كتير واسمع قصص ياما
بس بما انى مش بروح هنا ولا هنا ومش بخلص اوراق ولا بحتك بالنظام البيروقراطي لدولتنا المبجلة

فكنت اسمع بس لحد ما روحت مع بابا وماما مشوار ولقيت الست البتخلص اجراءات اعده وفتح درج مكتبها شوية والبيقدم طلب بيحطلها فية فلوس

اتصعقت ووشي احمر وازرق واصفر وحسيت انى بشوف شئ كنت اسمع عنه وفجاة لقيته اودامى

بس هي اول صدمة كدا وبعدها بقيت اشوف النظام شغال عادى جدا والرشوة سمة اساسية فى البلد

تاخد مخالفة فى المرور تدي بتاع المرور كم جنية يقوم مغير رقم عربيتك لحاجة قريبة تلبس فى حد تانى مش مشكلة برضة

وعلى فكرة عجبني اوى موضوع
لأ يا عمده لأ

ربنا يوفقك

يعن نقول رسوم خدمة توزع مباشرة على الموظفين بعيد عن يد الدولة المخرومة
والله يا سيدى فكرة واقعية ولا فيها اى حاجه وترفع دخل الحزانا دول شوية

كلنا بنحلم

بس يا ترى امتى هتتحقق الاحلام دي


تعرف

انا برضه ماعبيش بطاقة

الراشي و المرتشي في النار
غير المسمى
ممكن نسميها؟؟؟؟ضريبه نفع و استنفع

و نعملها طلب حكومي بختم نسر لأ لألأ
بدل النسر نحط صورتك ما انت صاحب الفكره
و نسميه قانون روميل للمنفعه المتبادله بين الشعب و بعضيه
سلام يا رومي

زمان
قيل اذا اردت ان تنجز فعليك بالونجز
وده نوع سجاير
والأن
اذا اردت ان تلعب فعليك بالأرنب
تحياتى
زورنى

يا مرتشين دلونى
الهبر فين اراضيه

loooooooooool

وهي دي اخرتها
وزارة الرشاوي العمومية

:)

الزعيمة
شكرا على هذا التعليق الجميل
وأتمني المدوامه على ذلك
ROMIL

shady
يا مرحبا يا مرحبا
زعيم حزب العواطليه
يادي النور يادي النور
ألاقيش عندك شغلانه
بس الفكره اللى انت بتقول عليها ممكن أي حد تاني يجي ويخترع لنا نوع تاني من الرشاوي
سلامي ليك وللحزب
ROMIL

أُكتب بالرصاص
هو فيه أحسن من الاحلام
أما بالنسبه لموضوع البطاقه ماتخافشي انا أضمنك
ROMIL

ام العيال
مين قال ان الرشوه حرام
الضرورات تبيح المحظورات
شرفتي المدونه
ROMIL

جمال الدولى
شكرا على الزياره
بس كنت عايز اسألك
أنت دولي ازاي ؟
طيب لما اجي اطلبك اضيف كام زيرو؟

ROMIL

ابوامل
ملعوبه يا أبو أمل
ربنا يخليها لك

ROMIL

Epitaph
لا مش دي اخرتها
اخرتها جمهورية رشاويستان المهلبيه

إرسال تعليق

Links to this post

إنشاء رابط