الاقصى نادى والندى غالي ...ويهون عشانه العمر لو غالي
? يسقط الواد وأبوه: أكتوبر 2006

28 أكتوبر 2006

مشروع قانون


مجرد أقتراح
من الغريب فعلا انتشار ظاهرة الرشوة بصورة غريبة واعتبارها شيء عادي فعندما يهمس الموظف بطريقه رومانسية في أذن سعادتك " كلك نظر" "و تشيلني وأشيلك" وكلام كثير من هذا النوع وعندما يقول المعتدلون أنها رشوة يردد الراشي والمرتشي على حد سواء أنا تسليك مصالح لا أكثر ولا أقل والغريب أيضا أصبح وجود موظف شريف غير مرتشي خروجا عن القاعدة .
فأنا من هذا المنطلق أطالب الحكومة
" سيعتقد الكثيرين أني أطالب بتوقيع أقصى العقوبة وهي الإعدام شنقا لكل مرتشي "
لا يا رجالة فاتت عليكم المرة دي
وهذا ملخص لما أريد تفعيلة :
_ أطالب الحكومة بتقنين الرشاوى وكفالة الغطاء القانوني لها على أساس أنها أصبحت ظاهرة عاديه والحاجة أم الاختراع .
_ يتم تقسيم الرشوة حسب المنصب من أول ساعي المكتب إلى الناس الكبار قوي
وفي المقابل تصنف المصالح المراد تسليكها الي فئات فمن غير المنطقي أن نساوي بين شهادة صحية مضروبة وبين شهادة صحية لعبارة مضروبة برضة .
_ ويتم تشطيب قانون للعقوبات " طبخ كلة قديمة قوي غيروا " مزدوج حيث يعاقب المواطن الذي يرفض تقديم رشوة بأرغامة على دفع الرشوة دوبل وتعطيل مصالحة لمدة لا تقل عن 30 يوم ولا تزيد عن 5 سنوات " ويتعلم عليه" اذا اراد قضاء مصالح أخرى .
أما الموظف الذي يرفض أخذ الرشوة فيتم وصمة بأنه مواطن شريف مع كوكتيل عقوبات خصم وتأخير الترقيه ويتم نقله الى أماكن وبؤر الرشاوي في البلد عقابا له على ما أقترفته يديه .
_ ملحوظة :ةيجب احتفاظ الرشوة بأسمها حتى لا تفقد مبادئها ومعانيها السامية وحتى لا يقوم الموظفين بأختراع أشكال أخرى من الرشاوي.
_ يتم أنشاء المجلس الاعلى للرشاوي تمهيدا لان تصبح وزارة مستقلة ويترأس هذا هذا المجلس أكبر أشاوسة الرشاوي في مصر.
_ وعنه يتم انشاء صندوق للرشاوي على غرار صندوق الزمالة و يكون الصندوق زجاجي ليضرب به المثل في الشفافيه المفتقده كثيرا في مصر .
_ يتم تقسيم محتويات الصندوق بين الحكومة والممولين " الموظفين" كما ذكرت حسب المنصب ويقدم الصندوق اعانات عاجلة للموظفين المتهمين بالاختلاس وتبديد العهدة والتجارة في العملة وغيرها من القضايا التي تخل بالشرف فقط .
_ يتم أستشارة فضيلة المفتي في مدى مشروعية تقديم تأشيرات الحج والعمرة من هذا الصندوق " أتوقع الموافقة " بمنطق : من والى الشعب ، والخروج عن الحاكم جريمة ومن قدم شيىء بيداه التقاه وانا لله وانا اليه لراجعون .
_ يقيم الصندوق حفل يومي يضم كل من أسود الرشوة وزوجاتهم والاشبال ويقدم جوائز في المجالات التاليه :
- جائزة احسن مرتشي محترف
- جائزة احسن ناشىء مرتشي
- جائزة أحسن طريقه للرشوة
- وجوائز عن مجمل الاعمال
- وجوائز تشجيعية أخرى
_ أخيرا يتم تلخيص هذه القوانين والتوصيات فيما لا يقل عن 350 صفحة حتي لا يتسنى لاحد قراءته ويعرض على مجلس الشعب موافقون موافقة وخلص الموضوع " وهي جت على دي مافيه القوانين سيئة السمعة وقانون القضاة وقوانين منع النشر خالص" وكده يبقى الموضوع اتحل


Arabforever2004@yahoo.com

23 أكتوبر 2006

كل عام وأنتم بألف خير


كل عام وأنتم بألف خير

10 أكتوبر 2006

النظرية المباركيه


معاك ياريس
نظريه برضه
تعالوا نحسبها مع بعض
ماذا لو حل الريس مشكلة البطالة ؟
وما المنطق في أن تحل مشكله وتخلق مشاكل
لو قضينا على البطالة ؟
1-أدى ذلك تقليل معدلات الجريمة
مما يهدد أمن النظام المصري في الصميم أيوه في الصميم وذلك لأنه يجبر النظام على تصفية جيوش الداخلية .
2- القضاء على المشكلة في حد ذاتها مشكلة
طب الناس والرأي العام حيتكلم عن أيه طبعا مش حيلاقوا أفضل من الريس والمعتقلات وأزمات القضاة والصحفيين والكويز والتوريث وبلاوي تانيه وليلة كبيرة أحنا مش قدها .
3- أدى ذلك الى نشاة طبقة جديدة من الساخطين على الحكم
وهم القهوجية تجار الميه السخنه والنظام مش ناقص .
4- الأضرار البالغ بالمؤسسات المباركية .
طب البلاوي اللي فاتت قلنا ماشي طب والصحف الحكومية تسترزق منين إذا كانت كل القضايا شائكة من موقف مصر من حماس والعراق وعلاقتنا مع أمريكا والضغوط الدولية والتقزم السياسي لمصر دا حتى القضية الإيرانية مش عارفين موقفنا والصحف دي لوقفلت حنجيب منين موالسين للريس وأبن الريس دي تبقى كارثة .
5- طب لو قضينا على البطالة واستخدمنا الثروة البشرية ودفعنا عجلة التنمية والاقتصاد بقى اقوي لا قدرا لله
حنا خد معونات من أمريكا أزاي ولنفرض إننا استغنينا عنها مع أنها سبوبة جامدة وأصبحنا قوة اقتصادية سنتصادم مع أمريكا والعياذ بالله وسنطالب بدور أقوى في المنطقة .
يرضيكم يعني يطالبونا بإصلاحات دا معناه تغيير السيستم
أنا شايف ان البطالة فاتحه بيوت ناس اكتر من الشباب اللي قاعد على القهاوي
كتاب عايشين دور الوطنية ومحللين وبرامج مثل الغيط غيطك وحالة حمار طب يتكلموا عن ايه حبتين اصلاح وحبه بطالة مفيش مواضيع تانية نتكلم فيها
ونجيب لنفسنا لي وجع الدماغ دي دايرة كبيرة ما هي ماشية بتعرج بس ماشية
متنازل عن حقوق الملكية الفكرية للريس عرفانا للجميل

Arabforever2004@yahoo.com

03 أكتوبر 2006

لأ يا عمده لأ

الى عمدة بلدنا

ياحضرة العمده أبنك حميده "ييه مش دي" يا حضرة العمدة بما انك اديتنا مساحة للكلام في القعدة دي آن الأوان إننا نتحاسب بقى
يا عمدة أنت كدبت علينا كتير قولي أزاي ؟ اقولك البدايه ساعت ما مسكت العموديه قولت انك مش حتقعد فيها اكتر من مدتين صح ولا ايه ياعمدة؟ وأديك دلوقتي ياعمدة فيها بقالك خمس مدد واخل في الساته "6" مش قصدي حاجة وربنا يطولنا في عمرك دا اول هام

تاني هام احنا بقالنا 25 سنه ياعمدة تحت اللى بتقول عليه الاحكام العرفيه وقولت لينا ان دا حا يحمي البلد من المدعوق اللى اسمه البنجو واللى بيقولوا عليه برة الارهاب
طب دلوقتي الواد ابني بيقولي يابا البنجو والهباب دة بقى اكتر من البلهارسيا في الترعة غير بقى الارهاب والسنه اللى فاتت تشهد باللى حصل نواحي البلد البحرية جنب اولاد عمنا كدة وبسبب الاحكام العرفية دي الواحد مبقاش عارف يكلم اعفنها غفير من اللي حداك يا عمدة

تالت هام الترعة ياعمدة اللى دفعتنا فيها دم قلبنا وقولت لنا انها حتجيب لنا خير محدش حيعرف يكلمنا بعد كدة لدرجة ان انا خفت للجماعة اللى قبلي يوزهم الشيطان ويقولوا طب ليه ما ننفصلشي ليه عن البلد الفقرانه دي ليه وناخد الليله كلها واتضح في الاخر ان الحكايه كلها خازوق من الخوزيق اللى خدتها البلد .

رابع هام أنك خليت البلد في مهب الريح علي الشاعر ورفضت تعين شيخ للبلد ودا مخلي البلد على كف عفريت وكلام كتير عن امننا القومي وحاجات تانيه بقولوها الناس اللى معارضه سعادتك في حالة لا قدر الله بعد الشر لو حصل لسعادتك حاجة مع البلد كلها عارفة انك ياعمدة قبل ما تمسك العموديه كنت شيخ للبلد صح ولا لأ ياعمدة
بعد كدة يا عمدة جيت وقولتلنا ان الواد المحروس ابنك مالوش في العموديه وغاوي كوره وفجاءة يا عمدة اخترعت له قال ايه امانه سياسات دوار العمدة ودي تطلع ايه دي ياعمدة ؟ كل اللي فهمناه انها سياسات يعني جمع كلمه سياسة زي ما خدناها في المدرسه يعني الكلمه دي بتوصل للعموديه عدل
دا غير المصايب اللي بترف على البلد المركب اللي غرقت في الترعة والقطر اللي ولع باللي فيه دا غير ديونا اللي كترت والواحد مش عارف يودي وشه من الناس فين غير اننا يا عمدة مابنسألش عن ولادنا اللي برة وهما شغالين بالمثل اللى بيقول من خرج من دارة اتقل مقدارة برة وجوة والله ياعمدة ما هو مفيش شغل يا عمدة وأزاي ياعمدة تقول ان اللي حيقول انك ماشي غلط حيتحبس انت مش منزل من السما واللي زاد وغطا ان اللى يقول ان العمدة الفلان وحش برضه تحبسه او تبيعة هدومه ماتسيب اللي يتكلم يتكلم علشان نعرف الصح من الغلط
كله كوم واللي بيحصل النواحي البحرية دا كوم تاني ازاي نسيب اخواتنا يموتوا كده ومين اللى بيضربهم اللى بقولوا انهم ولاد عمنا وكل اللى حضرتك بتعمله انك بتتصل بفلان الفلاني وتتشاور مع العلاني على رأي الحاج ابراهيم أبو عيسى اللى داير في البلد يقول انك بتتصل أنت حتزلنا ياعمدة بالاتصالات دي أحنا ممكن نجمع من بعضينا ونشتري لك كارت شحن ابو ميت جنيه ولا تزعل نفسك بس احنا ما يرضناش الوضع ده
احنا ممكن نعمل كتير ياعمده احنا ممكن نقطع عنهم الميه والنور ونطرد الكام عيله اللى باعتنيهم لنا لزوم الاتصالات بتاعة سعادتك طب ازاي النجوع والكفور اللي حوالينا تجيب حق عرب عند الحج حسن طب دا متاخد منه كام فدان وعايز يرجعهم ولا انتم عايزين الوضع يفضل على ما هو عليه وأعمل حاجه البلاوي كترت قوي ياعمدة ومش عارف ياعمدة الدصطور حتنشر الكلام ده ولا ايه وفيه كلمه أخيرة " طفح الكيل ياعمدة وبلاش تكتر في الاتصالات و السلام ختام
مواطن بسيط
عن اهالي الكفر

Arabforever2004@yahoo.com