الاقصى نادى والندى غالي ...ويهون عشانه العمر لو غالي
? يسقط الواد وأبوه: مارس 2007

30 مارس 2007

دينك _ قوميتك _ كرامتك

كتير بسأل نفسي ليه أحنا عايشيين؟ أو ربنا خلقنا ليه؟ مش كفر والعياذ بالله بس ايه هي الجدوى تقريبا وصلت لمجموعه من الاشياء اللى مقدرتش أعاند نفسي فيهم عايش علشان
الدين
بس الدين أصبح ملطشه وبقى أى كلب معدي في الشارع وأي حيوان عايز شهره يطعن فيه ويسىء اليه الحمد لله أن الدين حافظه ربنا مش أحنا والا كان ضاع من زمان
دا حتى الرقاصات بقوا يتكلموا في الدين
عايش علشان
القومية
الكل عارف حال العرب والقوميه أصبحت سراب وأنا شايف أننا أقرب لقوميه مع اسرائيل وليس العرب
" واحد كلب زي كرم جبر " يلمه "
قال كلمه في أخطر مايكون في الحوار المشهور لما كان مع عماد أديب وعبد الحليم قنديل

" الله يرحم الشنط اللى كنت بتجيبها من العراق وليبيا
بس اللى يضحك في الموضوع أنه عامل برنامج أسمه
" صوت العرب
"
لا تعليق
الخطوره مش في الشتيمه الاتنين يتحرقوا بجاز وسخ الخطوره أن المغزي من الكلام ده أن العرب بقوا أعداء وأميريكا وأسرائيل أقرب ألينا من أنفسنا بمعني أن لما أي حد يا خد فلوس من العراق وليبيا والسعوديه يبقى عميل " مع أن دا محصلش" ولما الحكومه وناس تانيه كتير تاخد فلوس من امريكا تحت اي مسمى يبقوا ناس وطنيين
" وهل تتساو يد سيفها كان لك ..بيد سيفها أثكلك" أمل دنقل

عايش علشان

الكرامة

ضاعت والحمد لله على كل شىء
" سبحانك كل شيء رضيت سوى الذل" غالبا مظفر النواب
" الى كلب الروم "
كان نفسي ابدل عمري كله بلحظه في العصور دي
بس دلوقتي
"واحسرتاه"
أخرها قضية الاسرى المصريين
اللى يضحك في الموضوع أن يسري فوده في البرنامج بتاعه ع الجزيرة" حلقات عتليت"
جايب الكلام دا كله واكتر
من حوالى 6 سنوات ولكن بدل ما نطالب بحق جنودنا اللى أطهر من اللى خلفونا
هاجمنا الجزيره
ممكن يكون علشان الجزيرة أظهرتنا في دور العاجز
فالحكومه المصريه نعمل اي دور علشان شكلنا بقى وحش


"واحسرتاه" طيب بعد دا كله عايشيين ليه؟
مش عارف
بس فيه أخيره ممكن نعيش علشانها
الأمل
في أننا نرجع لديننا
الأمل
في أننا نرجع لعروبتنا

الأمل
في أننا نحافظ على الباقي من كرامتنا

الأمل
في أننا نحافظ على

الأمل

08 مارس 2007

مبارك _ مصر وجهان لعملة مش واحده


مصر لا تستحق الرئيس مبارك " مش عايز أي شتيمة من أي معارض قد تستغربون كلامي ولكن بالمقارنه بالاوضاع الراهنه والسابقه تتضح الرؤيه لنا "


1 – يعتبر الرئيس مبارك الأكبر " سنا" بين رؤساء وملوك الدول العربية ودول العالم ولكن نجد أن مصر هي الأقل بين دول العالم" سيبك من الريادة والكلام بتاع الاستهلاك الإعلامي ده " .

2- مبارك يملك حكومة غنية حكومة رجال الأعمال والليموزين وجميع أسباب الحقد الطبقي ومصر لا تملك إلا شعب فقير وكمان مديون .

3 – مبارك يخطط من الآن لمستقبل أبن جمال مبارك ومسألة التمرير الآمن والتوريث للحكم من جمال مبارك إلى أبنه

ومصر الآن تعيش اليوم بيومه لا تنظر إلى المستقبل وشبابها ينتظره الرصيف ومستقبل مظلم غير واضح المعالم .

4- سبحان الله مبارك علاقاته الخارجية امتياز مع مرتبة الشرف وسمنه على عسل حتى مع اليهود أولاد عمنا ومع ذلك مصر مستهدفه من كل جانب.

5- مبارك يحسن اختيار أصدقاء أبناءه زى عز ملك الحديد ولكن مصر لا تحسن اختيار أصدقاء أولادها " سيبك من نانسي وهيفاء والفقر والجنس والفول والطعمية والمخدرات " فنجد أن أصدقاء ولادك يا مصر هم من أمثال ممدوح إسماعيل ويوسف والى وغيرهم .

6. أكيد أبناء مبارك لديهم الفخر أنهم أبناءه ولكن أبناء مصر ينكرون هذه البنوة حتى لا يتم ترحيلهم أليها من الخارج ...... الشباب اللى ببجي له الضغط لما يسمع أغنيه نانسي أنت مصري

7-مبارك الأقوى بجيوش الداخلية ولكن مصر الأضعف بسلبية شعب وضعف أرادتهم .

8 – في النهاية مبارك هو اللى ماسك مصر " حاكمها " مش مصر اللى ماسكه فيه " مجبر أخاك لا بطل .

سيدي الرئيس أيها القابض على الجمر شكرا لك ولحكوماتك النظيفة على كل هذه المدة التي زادت على الربع قرن نحن لم ولن نقدر قيمة سيادتكم


ROMIL

Arabforever2004@yahoo.com

02 مارس 2007

من لم يمت بالتاج مات بغيره

في البدايه أحب أشكر كوبا على تمريره هذا التاج


بسم الله نبدأ


أسم مدونتك؟؟

من الواضح أن أسمها "يسقط الواد وأبوه" وذلك لأني بحب السياسه رغم قذارتها

لماذا اخترته.. ماذا تقصد به؟
أخترت هذا لاسم لأني معارض للتوريث واللى عايز يورث وماسك في الكرسي وضد خمسه وعشرين سنه أنا عشت منها واحد وعشرين سنه مليئه بالاخطاء والكوارث


هل فكرت في إغلاق المدونة.. والسبب؟

لأ طبعا بس بيجيلي حالات أكتئاب وأبطل أكتب لفترات طويله بس برجع تاني وياريت أكون ضفت أي حاجه للتدوين في مصر
واللى مفيش حد يعرفه عني أن كان عندي مدونه ناجحه على مكتوب بس هجرتها لأن المناخ العام معجبنيش بس لسه بتابع ناس بحبهم في مدونات مكتوب


صورتك ف المدونة، رمزيتها؟

الصورة للقائد الألماني أروين روميل كان عبقريه حربيه فأنا معجب بذكائه فقط ولا أتخده قدوة ولكن هو بالنسبه لي مجرد أسم مستعار

طبيعة كتابتك في المدونة بشكل عام.. سياسة.. قصة.. عبث.. كلام فاضي؟

أدعي أني بكتب في السياسه بشكل ساخر وذلك لأيماني بأن وقع الكلمه الساخرة أقوي من الكلام العادي


لماذا تدون أصلاً؟

مش عارف بس التدوين نوع من أنواع حرية الرأي والتعبير اللى واجعين دماغنا بيها قولت أجرب وخصوصا أني أداب قسم صحافه ويعتبر أختبار بسيط في دخول مجال الاعلام

أحلى جملة قيلت لك في وصف مدونتك؟

فيه جمله مش قادر أنساها كان واحد حب يجاملني قوي بس من الواضح أنها وسعت منه كتير بس الكلام ده كان في مدونتي على مكتوب
شبهني بالعملاق أحمد رجب
لذلك مش قادر أنسى التعليق ده

التعليقات بالنسبة لك.. أهميتها؟
رجع الصدي زي ما درستها في صحافه ودي من أهم الميزات اللى بيتميز بيها النت عموما والمدونات خصوصا يعني بتعرف المدون هو واقف فين
وده برضه بيساعد على عرض الرأي المعاكس والاستفاده منه وعدم الانفراد بالرأي

أحلى بوست كتبته.. ضع اللينك.. ثم اذكر لماذا؟

  • النظرية المباركيه


  • ليه بقى مع أني مش حاسس أنه أحلى بوست بس البوست ده أتنشر في الدستور قبل ما أبقى مدون وتقريبا كان أول حاجه أكتبها في حياتي وهو بيتكلم عن مشكلة البطاله في مصر بطريقه ساخرة

    أفضل مدونة قرأتها.. يمكن اختيار عدة مدونات؟

    فيه مدونات كتير عجبتني قوي بس قليل اللى أستمريت في متابعتهم زي

  • أبيتاف


  • عندما يغيب القمر

  • والمدونه دي لمدون عراقي أسمه عماد السامرائي لكن أنا بعتبره نزار قباني الجديد

  • أياكش تولع


  • المزاجنجي

  • الوعي المصري

  • يقولها على طريقته

  • تخاريف جيمي

  • الطنطاوي زنجولا

  • ومدونات تانيه كتير لا سبيل لحصرها دلوقتي

    أفضل بوست قرأته.. يمكن اختيار أكثر من بوست.. ومتنساش اللينك؟

    فيه كتير جدا عجبني بس الحقيق مش فاكر أيه حاجه واضح أن الزهايمر أشتغل في السؤال ده بالذات
    بس أكيد فيه بوستات كتير عجبتني


    هل خسرت صديق بسبب كتابة هنا؟

    لأ طبعا أزاي أخسر أصدقاء بسبب المدونات بس الحكايه ليها وجه تاني المدونات خدتني من أصحابي اللى من لحم ودم قصدي أصحابي الى مش بحتاج نت علشان أقابلهم

    حد قل أدبه ف التعليق.. إيه رد فعلك؟

    تقريبا لأ ولو حصل حرد عليه عادي الا اذا كان في التعليق كلام يجرح شعور أي زائر
    وبالتالى حالغي التعليق ده

    أسوأ بوست.. لازم تجاوب.. ويسمح بتعدد الاختيارات؟

    من الصعب جدا حد يقيم اللى هو بيكتبه ولذلك حسيب المهمه دي للردود أنتم اللى تختاروا أسوأ بوست في المدونه بعيدا عن المجاملات
    أوك؟؟؟؟
    أسوأ مدون.. ما هو حاتجاوب حاتجاوب؟

    البلطجه دي مش حتمشي معايا بس تمشي المره دي
    أسوأ مدون من وجهة نظري هو
    عبدالكريم سليمان" كريم عامر"
    وصاحب مدونة " الله الوطن فاطمة"

    أقوم بتمرير التاج لمين ؟؟؟؟؟؟
    حجيب أسماء تانيه بحبها غير اللى جابها كوبا في امبراطوريته
  • أبن عبد الناصر 56
  • و
  • المزاجنجي
  • و
  • أبيتاف
  • و
  • الطنطاوي زنجولا
  • وهكذا رضوى
  • أم العيال
  • ايثار بدون أقنعه
  • ثورجي وأعترافاته
  • شهروزه
  • تخاريف جيمي
  • يقولها على طريقته
  • ما بدا له
  • واحد من البني أدميين
  • نوران وشمعتها
  • شادي


  • وأي حد زار مدونتي وشكرا