الاقصى نادى والندى غالي ...ويهون عشانه العمر لو غالي
? يسقط الواد وأبوه: لأ يا عمده لأ

« Home | البدايه " لعلها تكون بفايده" »

لأ يا عمده لأ

الى عمدة بلدنا

ياحضرة العمده أبنك حميده "ييه مش دي" يا حضرة العمدة بما انك اديتنا مساحة للكلام في القعدة دي آن الأوان إننا نتحاسب بقى
يا عمدة أنت كدبت علينا كتير قولي أزاي ؟ اقولك البدايه ساعت ما مسكت العموديه قولت انك مش حتقعد فيها اكتر من مدتين صح ولا ايه ياعمدة؟ وأديك دلوقتي ياعمدة فيها بقالك خمس مدد واخل في الساته "6" مش قصدي حاجة وربنا يطولنا في عمرك دا اول هام

تاني هام احنا بقالنا 25 سنه ياعمدة تحت اللى بتقول عليه الاحكام العرفيه وقولت لينا ان دا حا يحمي البلد من المدعوق اللى اسمه البنجو واللى بيقولوا عليه برة الارهاب
طب دلوقتي الواد ابني بيقولي يابا البنجو والهباب دة بقى اكتر من البلهارسيا في الترعة غير بقى الارهاب والسنه اللى فاتت تشهد باللى حصل نواحي البلد البحرية جنب اولاد عمنا كدة وبسبب الاحكام العرفية دي الواحد مبقاش عارف يكلم اعفنها غفير من اللي حداك يا عمدة

تالت هام الترعة ياعمدة اللى دفعتنا فيها دم قلبنا وقولت لنا انها حتجيب لنا خير محدش حيعرف يكلمنا بعد كدة لدرجة ان انا خفت للجماعة اللى قبلي يوزهم الشيطان ويقولوا طب ليه ما ننفصلشي ليه عن البلد الفقرانه دي ليه وناخد الليله كلها واتضح في الاخر ان الحكايه كلها خازوق من الخوزيق اللى خدتها البلد .

رابع هام أنك خليت البلد في مهب الريح علي الشاعر ورفضت تعين شيخ للبلد ودا مخلي البلد على كف عفريت وكلام كتير عن امننا القومي وحاجات تانيه بقولوها الناس اللى معارضه سعادتك في حالة لا قدر الله بعد الشر لو حصل لسعادتك حاجة مع البلد كلها عارفة انك ياعمدة قبل ما تمسك العموديه كنت شيخ للبلد صح ولا لأ ياعمدة
بعد كدة يا عمدة جيت وقولتلنا ان الواد المحروس ابنك مالوش في العموديه وغاوي كوره وفجاءة يا عمدة اخترعت له قال ايه امانه سياسات دوار العمدة ودي تطلع ايه دي ياعمدة ؟ كل اللي فهمناه انها سياسات يعني جمع كلمه سياسة زي ما خدناها في المدرسه يعني الكلمه دي بتوصل للعموديه عدل
دا غير المصايب اللي بترف على البلد المركب اللي غرقت في الترعة والقطر اللي ولع باللي فيه دا غير ديونا اللي كترت والواحد مش عارف يودي وشه من الناس فين غير اننا يا عمدة مابنسألش عن ولادنا اللي برة وهما شغالين بالمثل اللى بيقول من خرج من دارة اتقل مقدارة برة وجوة والله ياعمدة ما هو مفيش شغل يا عمدة وأزاي ياعمدة تقول ان اللي حيقول انك ماشي غلط حيتحبس انت مش منزل من السما واللي زاد وغطا ان اللى يقول ان العمدة الفلان وحش برضه تحبسه او تبيعة هدومه ماتسيب اللي يتكلم يتكلم علشان نعرف الصح من الغلط
كله كوم واللي بيحصل النواحي البحرية دا كوم تاني ازاي نسيب اخواتنا يموتوا كده ومين اللى بيضربهم اللى بقولوا انهم ولاد عمنا وكل اللى حضرتك بتعمله انك بتتصل بفلان الفلاني وتتشاور مع العلاني على رأي الحاج ابراهيم أبو عيسى اللى داير في البلد يقول انك بتتصل أنت حتزلنا ياعمدة بالاتصالات دي أحنا ممكن نجمع من بعضينا ونشتري لك كارت شحن ابو ميت جنيه ولا تزعل نفسك بس احنا ما يرضناش الوضع ده
احنا ممكن نعمل كتير ياعمده احنا ممكن نقطع عنهم الميه والنور ونطرد الكام عيله اللى باعتنيهم لنا لزوم الاتصالات بتاعة سعادتك طب ازاي النجوع والكفور اللي حوالينا تجيب حق عرب عند الحج حسن طب دا متاخد منه كام فدان وعايز يرجعهم ولا انتم عايزين الوضع يفضل على ما هو عليه وأعمل حاجه البلاوي كترت قوي ياعمدة ومش عارف ياعمدة الدصطور حتنشر الكلام ده ولا ايه وفيه كلمه أخيرة " طفح الكيل ياعمدة وبلاش تكتر في الاتصالات و السلام ختام
مواطن بسيط
عن اهالي الكفر

Arabforever2004@yahoo.com

العمدة في الحمام و ما بيسمعش عشان صوت الجاكوزي عالي... مافيش فايدة

ALiaa
المشكله في العمده " ايه جاكوزي انتي ناسيه اننا في الكفر"
المشكله في اهالي الكفر
وشكرا على التواصل

العمدة مش فاضي لكم يا غجر اتلم يا واد انت وهو بدل ما يلمكم لمة الفراخ وكل واحد لسانه مدلدل من حنكه يتلم ويروح لغيطه جاتكم الهم

هو يقربلك ولا ايه يا مزاجنجي؟

حلو اوى طفح الكيل ياعمده
ربنا يوفقك
الى الامام
وعلى فكره انا عجبنى اوى طريقتك

الساحر
طبعا طفح الكيل
شكرا ايها الساحر على تعليقك الجميل

حلوة يا عم تعلبالصحراء يا جامد

أستاذ منجي
شكرا على هذه المجامله الرقيقه
أخذلتم تواضعنا

يرضيك يا عمده
اةةة يرضيني
بس كفر اية سيادتك اللي بتتكلم عنة دة انا بانزل المنوفية باتوهم.. سرب عربيات فورد كانهم بيوزعوها ع البطاقات التمويهية .. يووووة التموينية دي
ما علينا
سيبك من الواد ابوة بقي ماشي بسيكونس حلو اوي.. الاول كان بيرسل انذارت
فاكر حرب الخليج 1 بعثت لة ستة وسبعون انذارا
بعدها اكتفي بالشجب والتنديد.. دة ايام قانا 1 في نص التسعينات كدة.. بعدها بقي بيشجب ويندد بس بـحنيـّة وحاليا بقي بيتصل يسلم ويتطمن ع الاخبار ويدعو لانعقاد قمة ما
بكرة بقي مش هيتكلم خالص هيشاور.. السن بعيد عنك
اةة بلاش موضوع الدستور دة علشان بتجيلي حساسية الله يخليك.. اية يعني الدستور نغيّرة مدة واثنتان وثلاث مدد قاتلة

منور يا روميل ..ايه الكلام الجامد ده يا عم ..هو ده الشغل والا بلاش

أنا بقول تعالوا اما نعمل حاجه عملية ..بلاش كلام عايزين نحوله لفعل

ايه رأيك في الشهر المفترج ده نلم من بعض في منديل أبيض كبيير حق عمرة للعمده و اولاده الإتنين و مراة العمده بالمرة و نحطهم في عبارة من بتوع عمك ممدوح اسماعيل و هما و حظهم بأه ..ربنا يجعل دعاواتنا من حظهم و نصيبهم ..و لو حصل أهم يا سيدي هيروحوا ع النية ..يعني ربنا هيتقبلهم و يمكن يغفرلهم في الآخرة اللي عملوه فينا في الدنيا

ايه رأيك؟....وادي يا عم أول تبرع ..ربع جنيه مخروم زي البلد ما هي مخرومه و بتخر..في جيوبهم

سلام يا روميل

SOSA
أنتي فعلا سوسه
أنتي نزلتي جمهورية المنوفيه أمتى؟
محدش من الامن الوقائي قاللى
ولا حتي جهاز مكافحة الاجناس الاخري
مش مهم المهم انك بخير دلوقتي
ايوة انا فاكر الانذارت دي دي كان شويه منها بالرفد والباقي استدعاء ولي الامر
هو ده بقى التطور الطبيعي للحاجه الساقعه قوي
أخرتها عملنا سنترال ابن الايه

soosa el-mafroosa
هو ده ينفع معاه عبارة
دا حتى لو غرقت مش بعيد سمك القرش يرجعهم لينا ويقول لنا مش عايزين منكم حاجه
أنا بق5ول نجيبهم كلهم في ميدان التحرير ونسيبهم من غير حرس وأبقوا شوفوا ايه اللى حيحصل

يا واد يا روميل يا بطل انته مش خايف العمده يا واد يبعتلك الغفر يجرجروك للسلحليج
بس اسمع توينه عجب يا واد يا ثعلب
تحياتى

القادم من الريف
ولا بيهمني طبعا
أنت سمعت انه حيبعت ليا الغفر ولا ايه؟
متخبيش عليا

العمدة خربها اكتر ما كانت مخروبة
واحب ابشرك
اننا

داخلين على سنين سودااااااا

شهروزة الجميله
هو لسه اللون ده ما جاش عندنا ولا ايه؟
ربنا يستر علينا

إنه العمدة المتصل .. أنا بدأت أشك في إن العمدة يبقى طيار باين عليه تيار

Haitham
أنا شاكك أنه يون مش مصري
وتطلع نهايه القصه أنه عميل وتنزل تترات الفيلم والسلام عليكم ورحمة الله وبركاته

العمدة متبت فيها اكنه لو ساب الكرسى هيجيله شلل اطفال

والمشكلة ان ابن حضرته بتتفصله على مقاسه عشان يكون مرتاح فيها ( العمودية طبعا ) و مش ماشى الحال

على فكره انا اصلا اصلا من المنوفيه يعنى انت بلدياتى يا ريس والعمدة سوء صورتنا هيروح من ربنا فين .. تحياتى لأفكارك الروعه

وتحياتى للجميع

FrEe.PhArAoH
العمده مش حيسيبها الا اما يموت
أما بالنسبه للمنايفه منه لله

العمدة داخل علي المدة السادسة و ياخد الابتدائية و نجيب له سكوتر
الحل بربع جنية
بس مين اللي معاه الفرفر؟!

عم المجهول
مين اللى معاه الفرفر؟
تلك هي المشكله
طيب ما تعملها انت وتتقيد ضدك
يعني ضد مجهول

سيب العمدة يا بني متقلقش منامه

Mody Rap
كل سن وأنت طيب

إرسال تعليق